ინტერვიუ ბიძინა ივანიშვილთან ( გაზეთი "ასავალ დასავალი" 06.02.2012 )

 ბიძინა ივანიშვილი:  ვიდრე საუბარს დავიწყებდეთ, მსურს, მადლობა გადაგიხადოთ თქვენც, თქვენს რედაქციასაც და თქვენს ჟურნალისტურ ჯგუფსაც იმ პრინციპული პოზიციებისათვის, რომელიც ბოლო წლებში აშკარად გამოხატულია „ასავალ-დასავალის“ ფურცლებზე! შეიძლება, რამდენიმე გაზეთი ვერც დავასახელო, რომელიც მსგავსი ეროვნული და სახელმწიფოებრივი პოზიციებითა და პრინციპულობით გამოირჩევა. ეს არ არის პირფერობა... თქვენ გაქვთ მტკიცე პოზიცია და პრინციპული დამოკიდებულება რიგი მოვლენების მიმართ, რაც დასაფასებელი და ანგარიშგასაწევია. მართალია, დღემდე ვერ შევძელით შეხვედრა, მაგრამ იმედია, არ მიწყენთ. კიდევ ერთხელ ვაფიქსირებ ღრმა პატივისცემას თქვენი რედაქციისადმი და ვთვლი, რომ `ასავალ-დასავალი~ ერთ-ერთი გამოკვეთილი ლიდერია ქართულ ბეჭდვით მედიაში!

- ჩვენც მადლობას გიხდით, დრო რომ გამონახეთ ჩვენთან სასაუბროდ და აქვე, ერთსაც გეტყვით: ვიმედოვნებთ, ჩვენი საუბარი არა მხოლოდ გულწრფელი იქნება, არამედ ამ საუბარში იმ ე.წ. “უხერხულ” და საჩოთირო კითხვებსაც გაეცემა პასუხები, დღემდე რომ აწუხებს საზოგადოებას...

- კი, ბატონო... ყველა კითხვას გავცემ შესაბამის პასუხს. იმედი მაქვს, ყველა გაუგებრობა გაირკვევა და ყველაფერი დადგება თავის ადგილზე...

- კეთილი, მაშინ საუბარი ობამა-სააკაშვილის ვიზიტის შეფასებით დავიწყოთ. საზოგადოებამ თქვენს მიერ „ვაშინგტონ პოსტში“ გამოქვეყნებული წერილიც ნახა და სამთავრობო არხების მიერ შეცვლილი-დამახინჯებული კომენტარებიც მოისმინა ამ ვიზიტის შესახებ...

- კი, კი, ჩემი დამოკიდებულება ამ შეხვედრასთან დაკავშირებით „ნიუ-იორკ თაიმსში“ და „ვაშინგტონ პოსტში“ გამოქვეყნდა, სადაც, ვთვლი, რომ ნათლად ჩამოვაყალიბე ჩემი პოზიცია და ვთქვი, რომ საპარლამენტო არჩევნებში წარმატების შემთხვევაში, მე და ჩემი პოლიტიკური პარტნიორები ვიღებთ პასუხისმგებლობას, რომ სრულად განვახორციელებთ საქართველოს მიერ დეკლარირებულ საგარეო პოლიტიკურ კურსს და ჩამოვაყალიბებთ მრავალპარტიულ, პოლიტიკურ სისტემას. ამიტომ ჩვენ ვარწმუნებთ ამერიკის შეერთებული შტატების ლიდერებს და მთელ დემოკრატიულ თანამეგობრობას, ხელი შეუწყონ და წაახალისონ ქვეყნის სვლა ევროატლანტიკური ინტეგრაციისკენ და იმავდროულად, გამოიყენონ ყველა შესაძლო რესურსი თავისუფალი და სამართლიანი არჩევნების უზრუნველსაყოფად ჩვენი მოქალაქეებისთვის 2012 წლის საპარლამენტო არჩევნებზე. 

ყველა ქართველი იმედოვნებს, რომ ეს ვიზიტი ხელშესახებ წარმატებას მოუტონს საქართველოს დემოკრატიული გარდაქმნის გზაზე და ამით ჩვენი ოცნებაც ასრულდება. 

დიახ,  მე მადლიერებას გამოვხატავ ამერიკის სახელმწიფოსადმი, ჩვენთან მეგობრობას რომ აგრძელებს, მიუხედავად იმისა, რომ ის ინვესტიციები, რაც განახორციელა ამერიკის შეერთებულმა შტატებმა საქართველოში, ჩვენი ხელისუფლების ბოლო წლების ქმედებებმა ადეკვატურად ვერ ასახეს და ვერ გაუმართლეს...

თუმცა, ამ ყველაფრის მიუხედავად, დაგვიანებით, მაგრამ მაინც მიიღეს ჩვენი ქვეყნის ხელისუფლების პირველი პირი და მე ვფიქრობ, ეს იყო რევერანსი ჩვენი ქვეყნისადმი და არა - სააკაშვილისადმი!

- ჰო, სახელისუფლებო არხებს თუ დავუჯერებთ, ობამა სააკაშვილზე ლოცვით იძინებს და იღვიძებს...

- სახელისუფლებო არხებზე საუბარი შორს წაგვიყვანს და ვფიქრობ, აღარც უნდა დავკარგოთ დრო მათზე სასაუბროდ. მათთვის ტიპიური მოვლენაა ფაქტების დამახინჯება. ობამას გამოსვლაც კი არ თარგმნეს სწორად და რა თქმა უნდა, ეს ყველაფერი შეგნებულად კეთდება, რათა საზოგადოება ისევ ისეთ ინფორმაციულ ვაკუუმში ამყოფონ, რასაც `ნაციონალები~ გეგმავენ და რაც ამ ხელისუფლებას აწყობს... ობამამ ნათლად და მკაფიოდ გამოხატა საკუთარი პოზიცია და იმედი გამოთქვა, რომ საქართველოში სამართლიანი და ობიექტური არჩევნები ჩატარდება, რაც ამ არხებმა `ხელისუფლების ფორმალური გადაცემის' ფორმატში გააშუქეს...

- ხელისუფლების გადაცემაზე ანალოგიური განცხადება გააკეთა ჰილარი კლინტონმაც რამდენიმე ხნის წინ, მაგრამ აკაკი მინაშვილისა და გოკა გაბაშვილის განცხადებებით, თურმე, ეს სულაც არ ნიშნავდა ხელისუფლების გადაცემას სხვა პოლიტიკური პარტიისათვის. მათი ინტერპრეტაციით, ხელისუფლება უნდა გადაეცეს კვლავ „ნაციონალურ მოძრაობას“, ოღონდ მიხეილ სააკაშვილის გარეშე...

- რა თქმა უნდა, ეს ამას არ ნიშნავს. ხელისუფლების გადაცემა რასაც ნიშნავს, დემოკრატუილ ქვეყნებში ძალიან კარგად იციან და ისიც კარგად იციან, რამდენ ხანს უნდა იყოს მმართველი პარტია ხელისუფლებაში. დიახ, უნდა შეიცვალოს სახელმწიფოს  ლიდერიც, როცა დემოკრატიული წესით ხელისუფლების შეცვლაზე ვსაუბრობთ!... დიახ, სააკაშვილმა სხვა ძალას უნდა გადასცეს ხელისუფლება და უნდა გადასცეს ყოველგვარი წესებისა და კანონების დაცვით! ნათლად იგულისხმება, რომ სააკაშვილი ნებისმიერი ფორმით, აღარც და ვეღარც უნდა დარჩეს ხელისუფლებაში! მეტიც: მგონი, მაკ-კეინმაც კი უთხრა სააკაშვილს - შენ პრემიერად ვერ დარჩებიო... მათაც ასე წარმოუდგენიათ, რომ სააკაშვილი ხელისუფლებაში აღარ უნდა იყოს...

- სააკაშვილის ამბიციებზე საუბარიც შორს წაგვიყვანს, ბატონო ბიძინა... კაცი, მგონი, მომავალი პარლამენტის თავმჯდომარეობისთვის ემზადება...

- ამერიკის პოზიციას, რა თქმა უნდა, დიდი მნიშვნელობა ექნება. ვფიქრობ, ამ მხრივ მკვეთრი პოზიცია ექნება ობამას მთავრობას და ვფიქრობ, ნეოკონსერვატორებიც არ შეუწყობენ ხელს სააკაშვილის გაპრემიერებას ან პარლამენტის თავმჯდომარეობას... სააკაშვილის მიერ საკუთარ თავზე მორგებული სისტემის დანერგვით, ახლა იმკის ქვეყანა შედეგებს, უმძიმეს შედეგებს! სააკაშვილი, რომელიც მხოლოდ საკუთარი თავისთვის მუშაობს, მისივე ხასიათიდან გამომდინარე, სხვა ავტორიტეტს ვერ იტანს. მიზეზები ძალიან ბევრია და ამაზე ახლა არ ვისაუბრებ.

- ხასიათი ერთია, მაგრამ მის ფსიქოლოგიურ მდგომარეობაზე ბევრმა გაამახვილა ყურადღება...

- ჩემგან არ იქნება კორექტული ამ ფორმით საუბარი... მის ფსიქიკაზე მე ახლა ვერ ვისაუბრებ... რაც მისმა ხასიათმა `დაათესინა~, შედეგებს ახლა თავადაც იმკის! გუნდში ვერავის ენდობა... და ვერც დაეყრდნობა ვერავის... პრინციპში, სააკაშვილს არც ჰყავს გვერდით ისეთი ლიდერი, რომელიც ჩაანაცვლებდა მას და ეს ისევ მისი პრობლემაა. სააკაშვილი არ ენდობა საკუთარ გარემოცვას!

- ვანო მერაბიშვილსაც არ ენდობა? ჩვენი ინფორმაციით, თქვენი მეორე განცხადების მერე საერთოდ ხსნიდა თანამდებობიდან... მეტიც: სახელისუფლებო კულუარებიდან იმ ინფორმაციამაც გამოჟონა, თითქოს თქვენი განცხადების შემდეგ, სააკაშვილი მერაბიშვილს თავდაცვის მინისტრად უპირებდა გადაყვანას, ხოლო შინაგან საქმეთა მინისტრად ბაჩო ახალაიას ნიშნავდაო... მეტიც: იმასაც ამბობდნენ, რომ თქვენი განცხადების შემდეგ სააკაშვილი თათბირებზე აღარ ისწრებდა ვანო მერაბიშვილსო...

- ჩემგან მსგავს თემებზე საუბარი ჭორაობას უფრო დაემსგავსება და ამიტომ ვერანაირ კომენტარს ვერ გავაკეთებ თქვენს კითხვაზე... თუმცა, ამ მხრივ ინფორმაციულ ვაკუუმს არც მე განვიცდი... (იცინის). აქვე, კვლავ გავიმეორებ: მე არ ვაპირებ არავის დევნას პოლიტიკური ნიშნით! ერთადერთი მიზანი, რაც მაქვს, არის ამ ხელისუფლების შეცვლა მშვიდობიანი გზით, უსისხლოდ! იმასაც პირდაპირ გეტყვით, რომ დღეს სააკაშვილი ყველაფერს აკეთებს, რათა გუნდი არ დაეშალოს! არადა, ისეთი რყევებია შიგნით, რომ...

- რაღაც ინფორმაციას ფლობთ და არ ამხელთ, ბატონო ბიძინა?

- ჩვენ ხომ შევთანხმდით, რაზეც ვისაუბრებდით, გულწრფელად ვისაუბრებდით?! მაგრამ არის თემები, რომელთა “გაშლაც” და რომლებზე საუბარიც ჩემგან არც ეთიკური იქნება და არც - ჭკვიანური. ამიტომ დავტოვოთ ასე! რასაც ვამბობ, ჩავთვალოთ, რომ იმ სიტვყებითა თუ ფრაზებით ვამბობ ჩემს სათქმელს და დანარჩენს დრო გვიჩვენებს... ერთიცაა: ჩემთვის მოქალაქეობის ჩამორთმევაც ძალიან დიდი შეცდომა იყო სააკაშვილისთვის! სხვათაშორის, აქვე ვისარგებლებ შემთხევით და პირადად გადაგიხდით თქვენც მადლობას იმ თანადგომისთვის, რაც ჩემთვის მოქალაქეობის ჩამორთმევის გამო თქვენმა რედაქციამ გამოიჩინა. იმ აქციის გამოც, რომელიც სწორედ „ასავალ-დასავალმა“ და ჩემთვის ძალიან პატივსაცემმა რამდენიმე ადამიანმა დაიწყო - ჯემალ სეფიაშვილმა, თამაზ წივწივაძემ, დიმა ჯაიანმა, სოსო ჯაჭვლიანმა, გელა კეტაშვილმა, ლუკა კურტანიძემ და სხვებმა... სხვათაშორის, იური ვაზაგაშვილმა 300 ათასზე მეტი ხელმოწერა შეაგროვა... უღრმეს  მადლობას ვუხდი ბატონ იურისაც და ჩემს მიერ ჩამოთვლილ მართლაც ღირსეულ ადამიანებსაც ასეთი თანადგომისათვის! 

- თუმცა, ამ კუთხითაც ჩნდება კითხვები...

- თოთხმეტი თებერვლის შემდეგ სააკაშვილს ერთი თვე რჩება გადაწყვეტილების მისაღებად, თუმცა, ბევრი ვარიანტი არც მას აქვს. ეს ის შემთხვევა არ არის, რასაც ესენი ელოდნენ, თითქოს მე კვლავ პრეზიდენტს მივმართავდი თხოვნით, რომ მოენიჭებინა მეორადი მოქალაქეობა. ეს არის, იურიდიულ ტერმინს თუ ვიხმართ, „ნატურალიზაციის წესით“ გადასაწყვეტი საკითხი, როდესაც პრეზიდენტს უფლება არა აქვს, არ მომანიჭოს საქართველოს მოქალაქეობა! საფრანგეთის საელჩო სისტემატურად უკავშირდება ქართულ მხარეს და ახსენებს ამ საკითხს... როგორც იცით, მე განცხადება დავწერე, უარი ვთქვი საფრანგეთის მოქალაქეობაზე და ევროკავშირის კონვენციის თანახმად, არ შეიძლება, მოქალაქეობის გარეშე დარჩეს ადამიანი... სწორედ ამ კანონის მიხედვით, საფრანგეთის მხარე სისტემატურად ახსენებს ქართულ მხარეს ჩემთვის მოქალაქეობის მინიჭების საკითხს... ვფიქრობ, რომ ოთხმოცდათვრამეტი პროცენტით სააკაშვილი ვეღარ გაბედავს ჩემთვის მოქალაქეობის მონიჭებაზე უარის თქმას! თუმცა, ერთი-ორი პროცენტი მაინც რჩება სათუოდ, რადგან მისი ქმედებები ხშირად არაადეკვატურია და წინასწარ მაინც ვერ განსაზღვრავს ადამიანი, რას მოიმოქმედებს სააკაშვილი. არანაკლებ საინტერესოა ერთი ფაქტიც: ერეკლეს მოედანზე, საპატრიარქოს წინ, `ქართული ოცნების~ ცენტალური ოფისი სადაც უნდა განთავსებულიყო, მიმდებარე ტერიტორიას ყველა მხრიდან ღობე შემოარტყეს, მისასვლელი გზები ჩაკეტეს...

- სამშენებლო სამუშაოები წარმოებს და პირდაპირ ვთქვათ, - ნაგავს მიაქვს იქაურობა...

- ნაგვის თემა საერთოდ, ცალკე სასაუბროა... ელჩები სიცილით დაიხოცნენ ამ ისტორიის მოსმენისას... სახლის ნგრევაც გვიან დაიწყეს და, ხელისუფლებას ნაგვის გატანა შევთავაზეთ საკუთარი ხარჯებით. მოგვივიდა პასუხი - ეს ნაგავი ეკუთვნის მერიას და თქვენ არ გაქვთ უფლება, ამ ნაგავს შეეხოთო!.. ელჩებს სიცილადაც არ ეყოთ ეს ამბავი... ესენი ელემენტარულ ხულიგნობას აგრძელებენ. ბიჭობაში, უბანში რომ არიან ბიჭები და ასაკის მატებასთან ერთად ის ე.წ. `ბეზპრედელი” რომ ემართებათ ხოლმე, უმცროს ბავშვებს რომ თავში წაუთაქებენ და აგინებენ ხოლმე... ისევ იმ დროში არიან ესენი ჩარჩენილები და ჰგონიათ, ყოველთვის გაუვათ ის `ხულიგნური~ ქმედებები, რის უფლებასაც აძლევენ საკუთარ თავს... ყველა მეთოდი, რა მეთოდებითაც ესენი ოპონენტებს ებრძვიან, ნათლად აჩვენებს, თუ როგორი პატარა კაცები არიან, მცირენი არიან!

- ხელისუფლების თემა ერთია, მაგრამ არსებობს მეორე, ასევე მნიშვნელოვანი საკითხი, რომელიც ბევრ კითხვასაც აჩენს, ბევრში გაღიზიანებასაც იწვევს, შესაძლოა - იმედგაცრუებასაც... დარწმუნებული ვარ, ნაფიქრიც გექნებათ და თქვენეული დასკვნებიც გექნებათ გამოტანილი, მაგრამ პრობლემა პრობლემად რჩება...

ნაცვლად იმისა, რომ ბიძინა ივანიშვილი ერის გამაერთიანებელი ყოფილიყო, იგი იქცა რამდენიმე პოლიტიკური პარტიის და რამდენიმე პოლიტიკური ძალის პირველ პირთა ლიდერად... ვაღიაროთ, საზოგადოება თქვენეულ „წყალგამყოფს“ ერთგვარი წყრომითაც შეხვდა...

- გიპასუხებთ... საზოგადოების მოლოდინი რაღაც ახლისკენაა მიმართული, ახალი სახეების გამოჩენას ელის ყველა და ასე შემდეგ... ამაზეც მიდის აპელირება ბევრის მხრიდან... ჩვენ ვერ მოვწყდებით ჩვენს რეალობას და კარგად უნდა გავაცნობიეროთ: ჩვენ ვართ ისეთნი, როგორებიც ვართ! პოლიტიკური ისტებლიშმენტიც დამხვდა ისეთი, როგორიც დამხვდა! მე, ჩემი მხრივ, ახალი სახეების შემოყვანას ვცდილობ და ეს ცოტა ხანში უფრო კარგად გამოჩნდება...

- რაც შეეხება ძველ სახეებს...

- მე შემიძლია, ცალ-ცალკე დაგიხასიათოთ თითოეული მათგანი, თუ თქვენ გსურთ...

- ბრძანეთ...

- დავიწყოთ რესპუბლიკელებით, რომლებსაც ხშირად აკრიტიკებენ... პირველად ვაფიქსირებ ჩემს პოზიციას და ახლა, თავად რესპუბლიკელებიც “ასავალ-დასავალის” ფურცლებიდან შეიტყობენ მათ ჩემეულ დახასიათებას... მათთვისაც არ მითქვამს, რასაც ახლა გეტყვით... ვფიქრობ, ეს არის ყველაზე ძველი და თანმიმდევრული პოლიტიკური ძალა, რომელსაც, რა თქმა უნდა, აქვს ლოკალური შეცდომებიც... მაგრამ ქვეყნის საწინააღმდეგოდ მიზანმიმართულ და შეგნებულად უპასუხისმგებლო ქმედებებში მე ისინი არ შემიმჩნევია! თუმცა, თითოეული წევრის მიერ პატარა, ლოკალურ შეცდომებზე შენიშვნების გაკეთება შემიძლია...

- მით უფრო, თუ მათ წარსულსაც გადავხედათ და მეხსიერებასაც არ ვუჩივით...

- გეთანხმებით... შესაძლოა, მათი პოზიციები სრულად არ ემთხვეოდა საქართველოს მოქალაქეთა დიდი ნაწილის განწყობას...

- მთლად ყველაფრის გახსენება თუ გადავწყვიტეთ, ძალიან შორს წავალთ, ბატონო ბიძინა...

- ვიმეორებ: ძალიან მკვეთრ უარყოფით ქმედებებს მათ ნაბიჯებში მე ვერ ვხედავ! აი, მაგალითად, ისეთს, როგორი ნაბიჯებიც ნათელაშვილს აქვს... და, რომელიც ნაყიდი ჰყავს ამ ხელისუფლებას! `მემარჯვენეები~, რომლებმაც გადამწყვეტ მომენტში უღალატეს პრინციპებს...

- ახლა ისეთ თემას შეეხეთ, რომელიც ერთ-ერთ სკანდალურ თემად სახელდება ქართულ რეალობაში... თავადაც აცხადებდით, რომ წლების განმავლობაში თქვენ თანამშრომლობდით ამ ხელისუფლებასთან და ბუნებრივია, ის ინფორმაციაც გექნებათ, ვინ რითი “სუნთქავდა” ამ წლების განმავლობაში... ოპოზიცასაც ვგულისხმობ და ხელისუფლებასაც...

- მე რომ ამ თემას დავუბრუნდე, მართლა ძალიან შორს წავალთ. როდესაც მე, თავშივე, ეს განცხადება გავაკეთე და ისე შემოვედი ქართულ პოლიტიკაში, რა თქმა უნდა, გაცნობიერებულიც მქონდა, რას ვაკეთებდი. ისიც ვიცი, მუდმივად თუ ამ თემებით დავიწყებ აპელირებას, ეს არ იქნება კარგი არც ჩვენთვის და არც ქვეყნის ინტერესებისთვის! მე არ მსურს, ვიყო მამხილებელი და მაინცდამაინც ჩემგან გაიგოს ყველამ, ვინ ვისგან და როდის იღებდა ფულს! ხალხს დღეს გაღიზიანება კი არა, მოფერება სჭირდება და იმის ახსნა, როგორ, რა ფორმით დავამარცხოთ ეს რეჟიმი და კონსტიტუციური, მშვიდობიანი, საარჩევნო გზით როგორ გავუშვათ პოლიტიკური არენიდან სააკაშვილის ხელისუფლება!

გიმეორებთ: მე ჩემს პირველივე განცხადებებში ვთქვი ჩემი სათქმელი და თუ რაიმე სასიკეთოდ შეიცვლება, გამიხარდება და არც ამას დავმალავ! თუმცა, დავუბრუნდეთ რესპუბლიკელებს... გიმეორებთ: მიმაჩნია, რომ ეს არის თანმიმდევრული, ინტელექტუალური პიროვნებებით დაკომპლექტებული პარტია! მათი პრობლემა რაშია, იცით? რესპუბლიკელები დღეს არ არიან პოპულარულები და ეს არის მათი უმთავრესი პრობლემა! რა თქმა უნდა, ამას მეც ვხედავ!

- არც არასდროს ყოფილან პოპულარულები...

- კი, ბატონო, გეთანხმებით - არც არასდროს ყოფილან პოპულარულები და არც არასდროს ჰქონიათ დიდი რეიტინგი. რა ხდება, რატომ ავირჩიე ურეიტინგო პარტია? როგორ ფიქრობთ?

- შესაძლოა, ამერიკული მხარის ინტერესთა გათვალისწინებით, ვინმემ სწორ ნაბიჯადაც ჩათვალოს თქვენი ეს ქმედება...

- არამარტო ამერიკული კუთხით... მე გულწრფელად ვფიქრობ, რომ ძალიან საინტერესო ადამიანებით დაკომპლექტებული გუნდია. მათი პრობლემა იმაშია, რომ ისინი ხალხს ვერ ელაპარაკებიან ხალხის ენით, გასაგები ენით... არადა, თუ ლიდერი ხარ და იმისთვის მოდიხარ, რომ ერს წარუძღვე, შენ ვალდებულიც ხარ, ხალხს მისთვის გასაგებ ენაზე ესაუბრო! რესპუბლიკელები ყოველთვის აკადემიური ენით საუბარს ცდილობენ და ვერ საუბრობენ იმ ენით, რომლითაც მოიხიბლება საზოგადოება... აქ საზოგადოებაშიც უნდა ვეძებოთ მიზეზები... შესაძლოა, ჩვენ პოლიტიკური კულტურაც გვაკლია და, რა თქმა უნდა, საამისო მიზეზებიც არსებობს... იმიტომ არა, რომ სხვაზე უარესი ერი ვართ... არა! პირიქით - დარწმუნებულიც ვარ, ბევრს ბევრი რამითაც ვჯობივართ და ამაზე მთელი იდეოლოგია არსებობს, რომ ქართველები ერთ-ერთი ნიჭიერი ერი ვართ და სულ ებრაელ ერთან ვავლებთ პარალელებს, თუმცა, ამ თემაზე, თუ სურვილი გექნებათ, სხვა დროს ვისაუბროთ... დიახ, ჩვენ განსაკუთრებულად ნიჭიერი ერი ვართ, მაგრამ ამ ეტაპზე ჩვენი საზოგადოება ისეთია, როგორიც არის... ჩემი ძირითადი მიზანიც ამ ყველაფრის დალაგება და გამოსწორებაა... მარტო პრეზიდენტებში არ უნდა ვეძებოთ ჩვენი უბედურების სათავე და მიზეზი, ცოტა ჩვენი ბრალიც არის, სულსწრაფები ვართ, მოუთმენლობა გვჭირს.. ჩვენს ხასიათშიც ვლინდება მსგავსი ნიშნები.. რესპუბლიკელები ევროპისთვის გასაგები ენით საუბრობენ, მაგრამ ბოლო ათწლეულების განმავლობაში საქართველოში მომხდარმა მოვლენებმა ასეთი ხასიათი ჩამოგვიყალიბა, მეტ რადიკალიზმსა და მეტ სიფიცხეს ვართ ჩვეულნი... სხვათაშორის, ინტელიგენციის გარკვეულ ნაწილს მოსწონს რესპუბლიკელები, მაგრამ ასეთი ადამიანები ძალიან ცოტანი არიან... მესმის ესეც... რესპუბლიკელები, თუ ლიდერობა სურთ, ხალხისთვის გასაგებ ენაზე უნდა ესაუბრონ ხალხს, თუმცა, მათი აკადემიური ენა ჩემთვის დასაწუნი არ არის...

- მთლად ასეც ვერ ვიტყვით... გავიხსენოთ აკაკი ბაქრაძე, რომელიც აკადემიური ენით საუბრობდა, მაგრამ ხალხს უყვარდა...

- ჩემთვისაც ძალიან საყვარელი ადამიანი გახლდათ აკაკი ბაქრაძე...

- რესპუბლიკელეის შემთხვევაში, იქნებ მსოფლმხედველობაში უნდა ვეძებოთ პრობლემა?

- რას გულისხმობთ მსოფლმხედველობაში? იქნებ ჩავღრმავდეთ...

- პრობლემა დგას მათი პარტიის იდეოლოგიაში, რაც მათივე ქმედებებით მტკიცდება... გავიხსენოთ მათი პოზიცია 1991-92 წლების მოვლენების, იმავე პუტჩის პერიოდში... გავიხსენოთ მათი ცნობილი გამოსვლები სოჭში, სადაც აშკარად დაუჭირეს მხარი აფხაზეთის დამოუკიდებლობას...

- აფხაზეთის დამოუკიდებლობას დაუჭირეს მხარი? მსგავსი რამ არ მსმენია...

- დიახ, დიახ... თინა ხიდაშელმა და პაატა ზაქარეიშვილმა პირდაპირ დააფიქსირეს საკუთარი პოზიცია, რომ აფხაზეთს აქვს უფლება, იყოს სუვერენული სახელმწიფო... “აფხაზეთი საერთოდ არ არის საქართველოს მთავარი პრობლემა. მთავარი პრობლემა არის კორუფცია” - ეს სიტყვებიც თინა ხიდაშელს ეკუთვნის... სწორედ ამ და სხვა მსგავსმა ქმედებებმა თუ ფრაზებმა გამოიწვია მათ მიმართ ხალხის უარყოფითი დამოკიდებულება...

- მე ვერ გამოგადგებით პოლემიკაში, მაგრამ ისეთი თემაა, რომელიც არ უნდა დარჩეს ყურადღების მიღმა. ალბათ, თავად ქალბატონი თინაც და სხვებიც დააფიქსირებენ საკუთარ პოზიციას თქვენი კითხვების მიმართ...

- კიდევ ერთი... როდესაც პირველი ვანდალური აქტი ჩაიდინა ამ ხელისუფლებამ და “ურალის” ტიპის მანქანით შეამტვრიეს გლდანის ეკლესიის კარი...

- მაგ ფაქტზე მე ძალიან უარყოფითი რეაქცია მქონდა!

- და სწორედ იმ დროს და ამ ფაქტზე საუბრობდა ლევან ბერძენიშვილი აღფრთოვანებით... `მე დღეს ვარ უაღრესად დაკმაყოფილებული! დაპატიმრებულია ერთ-ერთი აღმაშფოთებელი და შემარცხვენელი ქართველი დამნაშავე!” - ეს სიტყვები გლდანის ღვთისმშობლის სახელობის ეკლესიის დარბევისა და ბასილ მკალავიშვილის დაპატიმრების დღესაა მის მიერ ნათქვამი...

- ლევანი აღფრთოვანებით შეხვდა ამ ამბავს?

- დიახ, დიახ... მეტიც - მურმან დუმბაძე რატომ გარიცხეს პარტიიდან? დუმბაძემ სახელმწიფოთაშორის ხელშეკრულების საფუძველზე ბათუმში მეჩეთის აშენების წინააღმდეგ ამოიღო ხმა და ვერ იგუეს... ამასთან დაკავშირებით მან რამდენიმე აქციაც გამართა...

- სხვათაშორის, დუმბაძესთან დაკავშირებით მე ჩემი დამოკიდებულება მაქვს და ეს პრობლემა, ადრე თუ გვიან, მოგვარდება, დარწმუნებული ვარ. ვთვლი, რომ დუმბაძესთან უნდა აღდგეს ურთიერთობები და დათო უსუფაშვილი მუშაობს ამ კუთხით, მე როგორც ვიცი... ისე, მეც იმავე სახის განცხადებას გავაკეთებ თქვენი გაზეთის ფურცლებზე: არ შეიძლება, მეჩეთი აშენდეს სააკაშვილის ერთპიროვნული გადაწყვეტილებით! ამ საკითხში, პირველ რიგში, საზოგადოების აზრია გასათვალისწინებელია და შესაძლოა, პოლემიკაც შედგეს სხვადასხვა დაინტერესებულ მხარეს შორის... სხვათაშორის, ეს სკანდალი ხელოვნურად არის  აგორებული ხელისუფლების მიერ. საქართველოში კონფესიებს შორის არასდროს ყოფილა პრობლემა და ეს ნუ დაგვავიწყდება!

- სწორედ ამ იდეოლოგიური განსხვავებებით არის გამოწვეული ის სამპროცენტიანი (და არა მეტი) რეიტინგიც, რომელიც მუდმივად აქვთ რესპუბლიკელებს... საზოგადოებას აქვს ეჭვები, რომ სწორედ თქვენი ავტორიტეტი და რეიტინგი იქნება საიმისოდ გამოყენებული, რომ ურეიტინგო და საზოგადოებისათვის იდეოლოგიურად მიუღებელი პარტიები აღმოჩნდნენ ხელისუფლებაში. სხვათაშორის, რასაც ბოლო წლების გამოცდილება გვიჩვენებს, სწორედ რესპუბლიკური პარტია იყო ოპოზიციური ერთობის ჩამშლელი...

- მე როგორც ვიცი, ყოველთვის რესპუბლიკელები არ ყოფილან ინიციატორები... მსგავი საყვედური ალასანიაზეც მსმენია... შეიძლება, სხვებზეც. ჩვენ რეალობა უნდა შევაფასოთ და რეალობიდან გავაკეთოთ ანალიზი. რა თქმა უნდა, უმწიკვლო პარტია ვერ იქნება რესპუბლიკური პარტია და ის მოგონებები, რაც თქვენ გაქვთ, შესაძლოა, მთლად უსაფუძვლოც არ იყოს, მაგრამ... თუმცა, მაპატიეთ, მაგრამ მე ეჭვი მეპარება, რომ თინა ხიდაშელი აფხაზეთის დამოუკიდებლობის მომხრე ყოფილიყო...

- თქვენც მოგაწვდით და გამოვაქვეყნებთ კიდეც ადრეც არაერთხელ გამოქვეყნებულ იმ ამონარიდს, რომელიც სოჭში გამართული ერთ-ერთი შეხვედრისადმი მიძღვნილ ბუკლეტში დაიბეჭდა...

«В Грузии именноно –их спрашивают  в первую очередь, поэтому их надо как-то неитрализоиать . Если привозить  на такие встречи по одному человеку и как-то прочищать нейтрализовать – это было бы одной из самыч главныч задач нашего проекта»  ---------(პაატა ზაქარეიშვილი)

«  Аспекты Грузино-Абхазского конфликта» Т9б  материалы Грузино-Абхазской конференции «Первые итоги» Москва 4-8 июля 2004 г.   ------- (გვ. 13)

«Абхазы имеют право создать отдельное государство. ... Бесполезно говорить о вхождении Абхазии в состав Грузии.» (დავით ბერძენიშვილი)

«Аспекты Грузино-Абхазского конфликта» Т9б  материалы Грузино-Абхазской конференции «Первые итоги» Москва 4-8 июля 2004  г. ------- (გვ. 136-137)

Абхазия сегодня не такая большая проблема для Грузии, как коррупция. Потеря Абхазии не разрушит Грузинское государство, а коррупция может разрушить! (თინა ხიდაშელი)  (გვ. 216)

- რა თქმა უნდა, ლოკალური შეცდომები იყო... ბერძენიშვილის გამოსვლაც უნდა გადამოწმდეს ეკლესიასთან დაკავშირებით... მე როგორც ვიცი, მას ბატონ მკალავიშვილთან მიმართებაში ჰქონდა პრობლემა. თუმცა, მისი პოზიციები კითხვებს ტოვებს... 

- ლევან ბერძენიშვილმა რაც ილია ჭავჭავაძეზე თქვა, იმაზე ცუდი რაღა უნდა ეთქვა როდისმე... “ილია ჭავჭავაძეს - მე ასეთ ქართველ მწერალს არ ვიცნობ” - მისი ფრაზაა... ალბათ, თქვენც გახსოვთ...

- რა თქმა უნდა, არ დაგიმალავთ, მისმა ამ ფრაზამ მეც გამაღიზიანა! ილია მოვლენა იყო ქართულ სინამდვილეში! ყველა ერს არა აქვს ბედნიერება, ილია ჭავჭავაძისნაირი კაცი ჰყავდეს! შეიძლება, სწორედ მაგ ფრაზის ბრალიც არის ის რეიტინგი, რაც აქვთ...

- სხვათაშორის, თქვენი პირველი განცხადების შემდეგ სწორედ ლევან ბერძენიშვილი იყო ის ერთადერთი რესპუბლიკელი, რომელმაც არ დაგინდოთ და მკვახე და მკვეთრი უარყოფითი პოზიცია დააფიქსირა თქვენს მიმართ... თქვენ კი, რამდენიმე დღეში სწორედ რესპუბლიკელები დაიყენეთ გვერდში...

- სხვათაშორის, პაატა ზაქარეიშვილმაც მსგავსი პოზიცია დაიკავა... თუმცა, ეს უკვე წარსულს ჩაბარდა... რა თქმა უნდა, ლოკალურ შეცდომებზე აღარ ღირს ყურადღების გამახვილება. მიმაჩნია, რომ რესპუბლიკელები განსხვავდებიან იმ რამდენიმე პარტიისგან, რომლებიც გამოკვეთილად ასრულებენ ხელისუფლების დაკვეთას! ამიტომაც გეუბნებით, რომ მე არჩევანი იმ რეალობიდან გამომდინარე გავაკეთე, როგორიც იყო და არის ქართულ პოლიტიკაში! ესენი თუ არა, აბა, ვიღა დარჩა უკეთესი? ამაზეც ვიფიქროთ...

- ვიდრე სხვა პარტიებზე ვისაუბრებთ, კობა დავითაშვილზე და ზვიად ძიძიგურზე გკითხავთ...

- თუ ლოკალურ შეცდომებს ვიგულისხმებთ, კობაზეც ბევრი რამის გახსენებას შეძლებთ, ალბათ, თქვენ... და, ზვიად ძიძიგურზეც...

- ზურაბ ნოღაიდელთან ერთად იყვნენ რამდენიმე თვის წინ, რომელიც, ბევრის აზრით, სწორედ სახელისუფლებო თამაშს თამაშობდა და ისე გაქრა პოლიტიკური არენიდან, რომ ვერც შეპირებული `ხელ-ფეხის მომტვრევა~ გვაჩვენა და ვერც რეიტინგი აიწია ხმამაღალი მუქარების მიუხედავად...

- კობაზე ბევრი საუბარი შემიძლია... ძალიან დიდხანს ვისაუბრეთ... არ მსურდა, რამე კითხვა უპასუხოდ დარჩენოდა ჩემთან დაკავშირებით... “შენ არა ხარ კაი კაცი, გირგვლიანის მკვლელობაზე განცხადება რომ არ გააკეთეო”, - კობა მეუბნება. კობასაც ავუხსენი და ახლა თქვენი გაზეთიდან ვამბობ: ალბათ, მოვა დრო, როდესაც დეტალურად მოვყვები, რა რეაქციაც მქონდა სანდრო გირგვლიანის მკვლელობასთან დაკავშირებითაც! არ მინდა, ტრაბახად ჩამითვალოს ვინმემ, მაგრამ, დიახ - არც თავი მაქვს სამართლებელი! მე არ ვყოფილვარ საჯარო ფიგურა, მაგრამ სადაც ვიყავი და სადაც მიწევდა პოზიციების დაფიქსირება, საკმაოდ მკვეთრი განცხადებები მაქვს გაკეთებული! ეს არის სიმართლე და გიმეორებთ: არსებობენ ადამიანები, რომლებმაც მკაფიოდ იციან გირგვლიანის მკვლელობასთან დაკავშირებით ჩემი პოზიცია და გიმეორებთ: ჩემი პოზიცია იყო ძალიან მკვეთრი და უარყოფითი! თუმცა, მე რომ ხმამაღლა დამეფიქსირებინა ჩემი პოზიცია, ეს უკვე პოლიტიკასი ჩემს შემოსვლას ნიშნავდა!

- კობა დავითაშვილის თემას მივუბრუნდეთ...

- კობასთან დამჭირდა რამდენიმეჯერ რამდენიმესაათიანი საუბარი, რომ ჩემი პოზიციების მართებულობაში დამერწმუნებინა. კობა მართალი და პატრიოტი  კაცია და რაც მნიშვნელოვანია ჩემთვის, თავადაც მეთანხმება მთავარში: სიცრუით არ უნდა მოვიდეთ ხელისუფლებაში! სიცრუით არ უნდა ვაცხოვროთ ხალხი და საზოგადოება... თუ ამა თუ იმ ქმედებისა თუ პოზიციის `შეფუთვაზეა~ საუბარი, ცარიელ ბოთლს გამოვიყენებ მაგალითად და გეტყვით - `ცარიელ ბოთლს~ მე არ `შევფუთავ~... `სავსე ბოთლს~ `შევფუთავ~ და ისე მივაწვდი საზოგადოებას... გასაგებია, რომ კითხვები ყველას მიმართ არსებობს და გარკვეული ჯგუფებისთვის მუდმივად იარსებებს... რა თქმა უნდა, ანგელოზები არავინ არ ვართ. ჩემს თავსაც არ ვთვლი ანგელოზად, თუმცა, ვინც ჩემთან დაკავშირებით რაღაც `ჩონჩხებზე~ და სხვა, მსგავს სისულელეებს ლაპარაკობს, მათ გასაგონად ვიტყვი: სხვებზე უკეთ ვიცი ჩემი წარსული და ვთვლი, რომ სინდისით ვიცხოვრე დღემდე და ასე ვცხოვრობ ახლაც! რა თქმა უნდა, შეცდომები მეც მქონია...

- თვლით თუ არა საკუთარ შეცდომად ნაციონალებთან ურთიერობას?

- უმჯობესი იქნებოდა, უფრო ადრე გამეგო მათ შესახებ ყველაფერი და უფრო ადრევე გადამედგა სხვა ნაბიჯები, მაგრამ ერთიცაა: ჩემი შეცდომები არ ყოფილა დაგეგმილი და შეგნებულად გამიზნული ქმედებების შედეგი. ალბათ, ასევე არიან რესპუბლიკელებიც, თუმცა თქვენ ძალიან მკაცრად შეაფასეთ თინა ხიდაშელი. მე არც ახლა მგონია, მსგავსი რამ ეთქვას მას...

- ბატონო ბიძინა, ჩვენ ადრეც გამოვაქვეყნეთ და ახლაც დავბეჭდავთ ამონარიდს იმავე ბროშურიდან...

- შეიძლება, ქვეტექსტში ასეც ჩანს და დასკვნებს თქვენვე აკეთებთ... ეს სხვა საქმეა... ალბათ, თინა უარს იტყვის თქვენს მიერ წაყენებულ ამ ბრალდებაზე...

- სოჭში გამართული შეხვედრის სტენოგრამა არსებობს, ბუკლეტად გამოცემული...

- თუმცა, თუ ეს მართლა იყო, ერთი რამ უნდა შევძლოთ ჩვენ: წარსულში დაშვებული ლოკალური შეცდომები წარსულსვე უნდა ჩავაბაროთ და პატიება შევძლოთ!.. რა თქმა უნდა, თუ ჩვენს მიერ დაშვებული შეცდომები არ არის მძაფრი და ამით ქვეყანას არ ვაზიანებთ... ისე, რატომ დღემდე არ გაუხსენა ვინმემ, მსგავსი ფაქტები თუ არსებობდა?

- სხვათაშორის, 1993 წელს, აფხაზეთის ომის შემდეგ, დავით ბერძენიშვილი ინიციატივითაც გამოდიოდა, დუმისთის მიღმა აფხაზური სახელმწიფო დარჩენილიყო, გუმისთის აქეთ კი - ქართული... თუმცა, რესპუბლიკელებზე პოლემიკა მართლა ძალიან შორს წაგვიყვანს და ერთს, მთავარს გკითხავთ: ის პოლიტიკური გუნდი, რომელიც გვერდით დაიყენეთ, რამდენად არის გამარჯვების მომტანი?

- ისეთივე დარწმუნებით გეტყვით, როგორც ამ რამდენიმე თვის წინ ვამბობდი: ჩვენ ორი მესამედით მოვალთ პარლამენტში! რა თქმა უნდა, შესაძლოა, კითხვები რესპუბლიკელთა ყველა წევრის მიმართ მოძებნოთ, ასეთი თუ ისეთი, მაგრამ ჩემთვის არ არსებობს ისეთი მძიმე კითხვა, რომელიც მათ ორმაგ თამაშში დამარწმუნებდა... ასეთებთან, ვინც დარჩა ქართულ პოლიტიკაში, სხვადასხვა ფორმით ყველასთან ვაპირებ თანამშრომლობას. ყველასთან, ვისაც ცრუ პოზიცია არა აქვს! მეტიც: იმათთანაც კი ვითანამშრომლებ, ვისაც შეშლია ოდესმე რაიმე და შემდეგ უღიარებია! ვისაც გულწფრელად უღიარებია და ვინც საკუთარი თავის საკეთილდღეოდ, პირადი გამორჩენით შეგნებულად არ ცრუობდა და ხალხს, საზოგადოებას არ ატყუებდა! ეს არის ჩემთვის გადამწყვეტი, თორემ, ხომ გეუბნებით, შეცდომები, შესაძლოა, რესპუბლიკელებსაც ჰქონიათ... ლევან ბერძენიშვილი, იმ პოზიციის გამოხატვის შემდეგ, ჩემს მიმართ რომ დააფიქსირა, უხერხულადაც კი გრძნობდა თავს... მე თვითონ გადავეხვიე, რადგან ჩვენ ერთად სხვა საქმეები გვაქვს საკეთებელი...

- იგივე “სხვა საქმეები” არ გაქვთ საკეთებელი ნინო ბურჯანაძესთან, ლევან გაჩეჩილაძესთან ერთად? ვთქვათ პირდაპირ: ხალხი თქვენგან მთელი ოპოზიციური სპექტრის გაერთიანებას ელოდება და ვერ აღგიქვამთ მარტოოდენ რესპუბლიკური პარტიის პარტნიორად... მით უფრო, ბურჯანაძისა და `სახალხო კრების~ პოზიცია არ არის უარყოფითი და ისინი არ თაკილობენ თქვენთან თანამშრომლობას... მეტიც: ნონა გაფრინდაშვილით დაწყებული და ლუკა კურტანიძით დამთავრებული, ცალსახად თქვენს მიმართ მხარდამჭერი პოზიციებით გამოირჩევიან. მით უფრო, თქვენც შეხვდით ქალბატონ ნონას, თქვენი შვილი ბერაც შეხვდა თქვენთვის მოქალაქეობის აღდგენის მოთხოვნით გელათიდან სამების ტაძრამდე ფეხით ჩამოსულ სოსო ჯაჭვლიანს, ლუკა კურტანიძესა და მერაბ შათირიშვილს...

- კი, კი... მართლა ძალიან კარგი ხალხია, ძალიან საინტერესო პიროვნებები არიან... სხვათაშორის, იმ დღეს დიმასაც შევხვდი, ჯაიანს... გადავეხვიე... ახლა, რაც შეეხება ნინოს... ჩვენ გვაქვს განსხვავებული შეხედულებები! ბურჯანაძე ისევ ფიქრობს, რომ ქუჩიდან უნდა მოხდეს პრეზიდენტისა და ხელისუფლების შეცვლა... ეს ერთი ფაქტიც საკმარისია საიმისოდ, რომ ჩვენ თავი შევიკავოთ ურთიერთობისაგან. ჩემი პრინციპული ხედვაა, რომ არცერთი ქართველი არ უნდა ვაცემინო და არ უნდა გავალახინო ამ რეჟიმს ჩემი პოზიციის გამო! და, მე მაქვს იმის რწმენაც და სურვილიც, რომ სწორედ ასე მოვიგებთ არჩევნებს! და მოვალთ ისე, რომ არ დაიღვაროს სისხლი და არ იცემოს არავინ! სხვათაშორის, ამ ცოტა ხნის წინ საჩხერეში განვითარებული მოვლენების გამო საჩხერლებსაც მოვუწოდე სიმშვიდისაკენ... 

ჩემთვის პრინციპული ხაზი გავლებული იყო იქ, რომ ბურჯანაძე არ თამაშობდა, მას ჰქონდა გამოცდილება, თანამოაზრეთა კარგი გუნდით იყო წარმოდგენილი “სახალხო კრების” სახით, მაგრამ მისი პოზიცია, - ბრძოლის არენა გადაიტანოს ქუჩაში - მიუღებელია! სხვა გზა არ ჩანს – ჩვენ ერთად ვერ ვიდგებით! ძირითადი განსხვავება ჩვენი პროდასავლური პოზიციებია, რომელსაც ნინო არ იზიარებს... ჩვენ ერთად ვერ ვიდგებით!

- თქვენ ერთგან ბრძანეთ, რომ შეკითხვები გქონდათ ბურჯანაძის მისამართით. დაუსვით მას ეს შეკითხვები ჩვენი გაზეთის ფურცლებიდან და შესაძლოა, მანაც გასცეს ამ კითხვებს პასუხი...მით უფრო, ბატონო ბიძინა, ნინო ბურჯანაძეს არ სჯერა რომ არჩევნების გზით შესაძლებელია ამ ხელისუფლების შეცვლა. ვთქვათ სიმართლე - ამის არც საზოგადოების უმრავლესობას სჯერა. და ამ შემთხვევაში, ბურჯანაძისთვის, ისევე, როგორც ქართული პოლიტიკური სპექტრის დიდი ნაწილისთვის, ქუჩა ერთ-ერთი `იარაღია~ და ბერკეტია საარჩევნო გარემოს შესაქმნელად. `ერთიანი სახალხო გადაწყვეტილებით შევცვალოთ ეს ხელისუფლება და შემდეგ ჩავატაროთ დემოკრატიული არჩევნები~ - ეს ბურჯანაძის პოზიციაა...

- გასაგებია, მაგრამ ასეთი რწმუნება არავის გაგვაჩნია, რომ მსგავს შემთხვევაში ყველაფერი მშვიდობიანად დამთავრდება... 

- ამ კითხვას, ვფიქრობთ, “კუდებს” გამოაბამს ხელისუფლება... თქვენ რუსეთს აგრესორი და ოკუპანტი ქვეყანა უწოდეთ, მაგრამ სახელისუფლებო არხებისა და `ექსპერტების~ მიერ კვლავ პუტინთან დაახლოებულ კაცად და “პუტინის პროექტად” იწოდებით...

- ახლაც ვამბობ, რომ ოკუპირებულია ჩვენი ტერიტორიები, მაგრამ ყოველ წამს ამის ხსენებას არ ვთვლი მიზანშეწონილად. ამათ სურთ, რომ ამათივე ენით ვესაუბრო ყველას, ვაგინო ყველა, მაგრამ ამაოდ... მე ჩემი მოქმედებისა და მოღვაწეობის სტილი მაქვს... პუტინი რომ ხელისუფლებაში მოდიოდა, მე იმ დროს წამოვედი რუსეთიდან... ახლა, გამოვდგე და სააკაშვილის სიტყვებით ვაგინო პუტინი - არ მიმაჩნია ეთიკურად, რადგან პუტინი იქნება თუ სხვა ვინმე, ჩვენ უნდა გავაცნობიეროთ, რომ რუსეთთან მოგვიწევს მოლაპარაკების მაგიდასთანაც და ისეც - საუბარიც და ურთიერთობაც. ჩვენ პატივი უნდა ვცეთ ჩვენს ყველა მეზობელს! ამერიკის ელჩთან ბასთან შეხვედრისასაც ვთქვი და ახლაც ვიმეორებ: მე დარწმუნებული ვარ, რომ მოვალთ ხელისუფლებაში და ისიც ვიცი, რომ საჭირო იქნება, დაველაპარაკოთ რუსეთის ხელისუფლებასაც! რა თქმა უნდა, ძალიან კარგია, როცა თავისუფალ სავაჭრო ურთიერთობებს ვამყარებთ ამერიკის შეერთებულ შტატებთან, მაგრამ არც რუსეთის ბაზრის ზერელედ ხსენებაა სასურველი რამ... უდიდესი ბაზარია... და, რაც მთავარია, რუსეთში მოღვაწეობით მილიონზე მეტი ჩვენი თანამოქალაქე ირჩენს თავს და არჩენს ოჯახებს... ეს უნდა დავივიწყოთ? ადამიანთან და ადამიანთა ჯგუფებთან ურთიერთბების დამყარებაა მთავარი, თორემ მტრად მოკიდებაზე ადვილი რა არის?

- ისევ ბურჯანაძის თემას მინდა მივუბრუნდეთ...

- თქვენი გაზეთის ფურცლებზე ასეთი სახის განცხადება მინდა გავაკეთო: წინა კვირაში სოციალ-დემოკრატიული პარტიის თავმჯდომარე ჟორჟოლიანისგან მივიღე წერილი და სხვათაშორის, ვიზიარებ მის პოზიციებს და ეს იქნება ჩემი პოზიციაც... ყველას გასაგონად ვაკეთებ განცხადებას: იმ პარტიებს, რომლებიც ვერ გაერთიანდებიან ჩვენს კოალიციაში, მაგრამ არ არიან იდეოლოგიურად მიუღებელნი, ვთავაზობთ მაჟორიტარული წესით არჩევნებისას საერთო კანდიდატზე შესაძლო შეთანხმების ვარიანტს...

- ძალიან სერიოზული განცხადებაა, ბატონო ბიძინა...

- დიახ, იმ პარტიებს, რომლებიც არ იქნებიან კოალიციაში `ქართულ ოცნებასთან~ და რომლებიც არ ტოვებენ ხელისუფლებასთან შესაძლო თანამშრომლობის ეჭვს, ვაძლევთ შესაძლებლობას და ვპირდებით, შეთანხმების შემთხვევაში ხელს არ შევუშლით მაჟორიტარულ არჩევნებში კანდიდატების წარდგენისას! დიახ, მსგავს შემთხვევაში მივაღწევთ შეთანხმებას საერთო კანდიდტზე!

- და ბიძინა ივანიშვილი იმ საერთო კანდიდატს 

დაუჭერს მხარს?

- რა თქმა უნდა, ოღონდ, გიმეორებთ: ჩვენ არ უნდა გვქონდეს ეჭვი ხელისუფლებასთან მათი შესაძლო თანამშრომლობის შესახებ!და მთავარ საკითხებზე ჩვენი ხედვები არ უნდა იყოს საპირისპირო...

- თქვენ რამდენიმეჯერ დაასახელეთ ის პოლიტიკური ძალები, რომლებიც, თქვენი აზრით, თანამშრომლობენ ხელისუფლებასთან. დაასახელებთ თუ არა ისეთ პოლიტიკურ ძალებს ან პიროვნებებს, რომლებზეც დარწმუნებით შეგეძლებათ იმის თქმა, რომ ისინი არანაირად არ არიან ამ რეჟიმთან გარიგებულნი?

- მე თავს ვარიდებ ვინმეს მხილებას... ჩემი მხრიდან არ იქნება ეთიკური იმ ხალხის დასახელება, რომლებიც ამ ხელისუფლებასთან თანამშრომლობაში არიან ეჭვმიტანილნი, ხოლო რაც შეეხება ამ რეჟიმთან გარიგებაში არმყოფ ძალებს... ეს ყველაფერი აისახება ჩვენს ქმედებებში! სხვათაშორის, იმათაც დაველაპარაკებით, რომლებიც შეიცვლიან პოზიციებს და უარს იტყვიან ხელისუფლებასთან გარიგებაზე... მოგეხსენებათ, `ქართული პარტიიდან~ წამოვიდა სოზარ სუბარი, რომელთანაც ვთანამშრომლობთ ჩვენ... ლეიბორისტებს გამოეყო ქალბატონი ნესტან კირთაძე. მასთანაც ვთანამშრომლობთ. ერთი შეხვედრა გვქონდა და კიდევ ვაპირებ მასთან შეხვედრას... თუ ოდესმე ვინმემ შეცდომა დაუშვა და იმ პოლიტიკურ გუნდში აღმოჩნდა, სადაც მისი ადგილი არ არის, ეს არ არის დანაშაული და რა თქმა უნდა, ამ ნაბიჯის გამოსწორების შემთხვევაში ჩვენ განვიხილავთ ნებისმიერ მათგანთან თანამშრომლობის პერსპექტივებს. გიმეორებთ: დღევანდელი გადასახედიდან, თანამშრომლობა გამორიცხულია რამდენიმე პარტიის ლიდერთან, თორემ პარტიის წევრებთან მიმართებაში ჩვენ პრობლემები არ გვაქვს! მხოლოდ იმ შემთხვევაში, თუ აღიარებენ ძველ შეცდომებს! მეტიც - ჩვენ თავად გავუწვდით ასეთ ადამიანებს თანამშრომლობის ხელს... დიახ, თუ საკუთარ პოზიციებს გადახედავენ, ჩვენ სხვებთანაც და შესაძლოა, ლიდერებთანაც კი ვითანამშრომლოთ...

- ლევან გაჩეჩილაძე საერთოდ არ გიხსენებიათ არცერთ თქვენს წერილში თუ გამოსვლაში. არადა, პოლიტიკაში თქვენი შემოსვლის წუთიდანვე გაუჩინარდა აქტიური პოლიტიკიდან...

- სხვათაშორის, მართალი ბრძანდებით, ჩემი პოზიცია ლევანთან დამოკიდებულებაში არც დამიფიქსირებია... საზოგადოებას აქვს თავისი მიდგომა ამ ადამიანის მიმართ.

- თქვენ რა დამოკიდებულება გაქვთ?

- აქაც მძიმედ არის საკითხი. რა თქმა უნდა, კითხვები  არსებობს ლევანთან. პირადად ვიცნობ ორივე ძმას. უმცროსს  უფრო ხშირად ვხვდებოდი ხოლმე და რაღაც ეტაპზე ვმეგობრობდით კიდეც. ის კონცერტებიც, ის ღონისძიებებიც, „უცნობის“ სახელით რომ ატარებდა, მეც დამიფინანსებია... სხვათაშორის, ჩემთან მოიტანა თავისი პირველი ლექსებიც... ამ ეტაპზე არცერთი მხრიდან არ ყოფილა აქტიურობა, თუმცა, დრო წინ გვაქვს...

- ბატონო ბიძინა, ერთ უხერხულ კითხვას დავსვამთ და იმედია, ისეთივე გულწრფელობით გვიპასუხებთ, როგორც აქამდე...

- ბრძანეთ...

- როგორც თავად აცხადებთ, და საზოგადოებისთვისაც ცნობილია, ხელისუფლებამ არაერთხელ სცადა ოპოზიციის წევრთა მოსყიდვა და დაშანტაჟება... პირდაპირ გკითხავთ - თქვენს მიერ გაღებული ფინანსებით ვაჭრობდა ხელისუფლება ოპოზიციის წარმომადგენლებთან? ანუ, თქვენი ფული იხარჯებოდა მათ მოსყიდვა-დაშანტაჟებაზე?

- ცალსახად გიპასუხებთ: არა! არასდროს არ ყოფილა შემთხვევა, მიშას მსგავსი საქმეებისთვის ჩემთვის ფული ეთხოვოს! როგორ გეკადრებათ? მაგას როგორ გამიბედავდა? ყველაფერი, რაც გაკეთდა ჩემს მიერ, იყო გამჭვირვალე და ოფიციალურად დაფინანსებული! ერთი იყო სოროსის ფონდად წოდებული ფონდი და მეორე - საქართველოს გადარჩენისა თუ ძალოვან სამინისტროების განვითარების ფონდი, ზუსტი დასახელება ახლა არ მახსოვს. თუ საჭიროდ ჩათვლით, მაგასაც დაგიზუსტებთ. ხმამაღლა ვაცხადებ: ყველაფერი ჩემი ინიციატივით კეთდებოდა!

- ისე, მართლა საინტერესოა, სააკაშვილი თვითონ მოდიოდა თქვენთან კონსულტაციების მისაღებად თუ თქვენ თავად მიბრძანდებოდით ხოლმე მასთან? იმასაც ამბობენ, ივანიშვილს სახლში სააკაშვილის მიღება არ სურდა და სულ ნეიტრალურ ადგილებში ხვდებოდაო...

- მოდით, ამ შეკითხვას უპასუხოდ დავტოვებ. მიმაჩნია, რომ არაეთიკური იქნება ჩემი მხრიდან ამ კითხვაზე პასუხის გაცემა. ისევ წეღანდელ კითხვას მივუბრუნდები... ერთხელ წამოსცდა მიშას ჩემთან, რომ კონკრეტული თანხის სანაცვლოდ გარკვეული სახის მოლაპარაკებას აპირებდნენ ერთ-ერთი ოპოზიციური პარტიის ლიდერთან და თანხაც დაასახელა. ისეთი მკვეთრად უარყოფითი რეაქცია მქონდა, მეორედ ვინ გამიბედავდა მსგავს თემაზე დალაპარაკებას და მით უფრო, ფულის თხოვნას?! `თუ მსგავს რამეს გააკეთებ, ხელსაც აღარ ჩამოგართმევ-მეთქი”, მაშინ ვუთხარი მიშას.

- ბოლო-ბოლო, “მოილაპარაკეს”?

- ჩემი ასეთი რეაქციის შემდეგ მსგავს ინფორმაციებს აღარ მეუბნებოდნენ. ასე რომ, არ ვიცი, როგორ დასრულდა მათი მცდელობები...

- ბატონო ბიძინა, “ვარდების რევოლუციის” პერიოდში თქვენ მართლა გულწრფელად გჯეროდათ სააკაშვილის?

- გულწრფელად მჯეროდა, არ გიმალავთ...

- მის ხასიათს, თუ გნებავთ - ფსიქიკას, ვერ ამჩნევდით “ხარვეზებს”?

- იმდენად იყო ეიფორიაში მთელი ქვეყანა და იმდენად უნდოდა საზოგადოებას ძველი რეჟიმის გაშვება, რომ მეც ხალხის გულისთქმას ავყევი... ალბათ, ეს ჩემი შეცდომაც გახლდათ... შეიძლება, ვინმესთვის - დანაშაულიც... სამწუხაროდ, სააკაშვილის სახე რომ გვიან გამოჩნდა, მაგაში ჩემი `დამსახურებაც~ არის... ეს პლუსია თუ მინუსი, ცალკე საკითხია. შეიძლება, ჯობდა, ადრევე გვცოდნოდა, ვინც იყო სააკაშვილი!

- თქვენს მეორე შეცდომად, გნებავთ - დანაშაულად თვლიან იმასაც, და ამბობენ, თითქოს ის ტყვია-წამალი, რომლითაც სხვა მამულიშვილებთან ერთად მე და ბექა სივსივაძეც რომ დაგვხრიტეს 26 მაისს, ის იარაღი და ტექნიკური შეიარაღება, ყველაზე მძაფრად 7 ნოემბერს და 26 მაისს რომ გამოსცადეს ქართველ ხალხზე, ის ხელკეტები, ნონა გაფრინდაშვილს და ელიზბარ ჯაველიძეს რომ მოუღერეს, ის გაზისა თუ აკუსტიკური მანქანა-დანადგარები, საკუთარ ერზე რომ გამოსცადეს ამ უღმერთოებმა - სწორედ ბიძინა ივანიშვილის თანხებით იყო შეძენილი...

- მუდმივად საუბრობენ იმაზე, რომ მე ვეხმარებოდი სააკაშვილს და სააკაშვილის მთავრობას, როდესაც ესენი მოვიდნენ ხელისუფლებაში. დღეს თქვენი გაზეთის ფურცლებიდან ვაკეთებ ამ განცხადებასაც და მორჩნენ ამ და მსგავს სისულელეებზე ლაპარაკს! მე ასე არ ვფიქრობ! დიახ, მე არ ვთვლი, რომ ვეხმარებოდი პირადად სააკაშვილს და მის მთავრობას! მე ვთვლიდი და გულწრფელად ვთვლი დღესაც, რომ მხოლოდ ჩემს სამშობლოს და ჩემს ქვეყანას ვეხმარებოდი! მეტიც: ხმამაღლა ვაცხადებ და ამის მოწმე კობა დავითაშვილიც არის, რომელსაც ტყუილს მართლა ვერანაირად ვერ ათქმევინებს ვერავინ და რომელიც სიცრუეში ძმასაც არ დაზოგავს: კორუფციასთან ბრძოლა ჩემი ინიციატივით მოხდა, ჩემი ოცნება იყო კორუფციის დამარცხება და რაღაც ფორმით ეს შევძელით კიდეც, თორემ დღეს კი ვუყურებთ სააკაშვილს და ვხედავთ, რასაც და როგორც აკეთებს. როგორ გაამწაროს ხალხი, სულ იმის ფიქრშია!

ერთ ამბავსაც მოგივყებით: სოსო ქუთათელაძე იყო მაშინ გვარდიის უფროსი და ის კურირებდა თითოეულ შენაძენს, როცა გვარდიისთვის ფორმის შესაძენად ვრიცხავდი თანხებს...

მიშასთვისაც არაერთხელ მაქვს ნათქვამი და სხვებიც არიან ამის მოწმეები: მე ყოველთვის კატეგორიული წინააღმდეგი ვიყავი, ჩემი ფულით იარაღი შეეძინათ! `გასაგებია, რომ სახელმწიფოს იარაღი სჭირდება, მაგრამ მე ჩემი პრინციპები მაქვს - არცერთ შემთხვევშაი ჩემი ფულით არ შეიძინოთ იარაღი!” - ამ სიტყვებს ვეუბნებოდი მიშასაც და სხვათაშორის, სხვებთან ერთად, რომლებსაც ახლა არ დავაკონკრეტებ, სოსო ქუთათელაძეც არის ამის მოწმე!

- საპატრულო რეფორმის დაფინანსებაში თუ მიგიღაით მონაწილეობა?

- პატრულისთვის ჩვეულებრივი მანქანები იყიდეს ჩემი ფულით. გიმეორებთ: არავითარი სპეცმანქანები ჩემი ფინანსებით არ შეუძენიათ! 7 ნოემბერს რომ გამოიყენეს, მაშინ დავინახე მეც, რომ მსგავსი მანქანები ჰქონდათ... მე მაქვს ჩემი ადამიანური, ცხოვრებისეული მკვეთრი პოზიციები და რა თქმა უნდა, მსგავსი ტექნიკის შეძენაში მე არავითარ შემთხვევშაი არ დავეხმარებოდი! ეს არის ჩემი ოფიციალური პოზიციაც და პასუხიც! მეტსაც გეტყვით: ესენი ვერც გაბედავდნენ ჩემი ფულით იმ იარაღისა თუ ტყვია-წამლის შეძენას, რომელსაც ასე ხშირად ახსენებენ ნათელაშვილი და სხვები! გიმეორებთ: ჩემი ფულით სამხედროებს ტანსაცმელი უყიდეს და სხვათაშორის, პირველი სამხედრო ფეხსაცმლის შემოტანას პირადად ვაკონტროლებდი. იმის შემდეგ სამმაგ ფასში იყიდეს იგივე ფეხსაცმელები და თანაც იმავე კომპანიისგან! ეგრევე ფულის კეთება დაიწყეს მერე. მე დავაფინანსე გარნიზონების მშენებლობა... თანხის ზუსტი რაოდენობა ახლა არ მახსოვს, მაგრამ იმდენი იყო, რომ ყველა გარნიზონის მშენებლობას უნდა ჰყოფნოდა, მაგრამ ბოლოს ვეღარ ვაკონტროლებდი ამ თანხის ხარჯვით პროცესს. ოქრუაშვილის წასვლის პერიოდი იყო და მას `აწერდნენ~ ამ თანხების გაქრობასაც... პირველ წლებში `სოროსის ფონდში~ მეც ვრიცხავდი თანხებს, რათა სახელმწიფო მოხელეებს ხელფასები მომატებოდათ და ამით, გარკვეულწილად, მართლა რეალურად დავამარცხეთ იმ წლებში კორუფცია...

- ანუ, თქვენ თქვენს მიერ გაღებულ თანხებს აკონტროლებდით და შეუძლებლად თვლით, რომ თუნდაც ხელფასისთვის გადარიცხული თანხებით იარაღი შეეძინათ?

- მე ანგარიშებს ვითხოვდი! რა თქმა უნდა! ვითხოვდი ეკიპირების ანგარიშებსაც და მშენებლობის ანგარიშებსაც...

- ანუ კონტროლის მექანიზმები გქონდათ...

- რა თქმა უნდა!

- თქვენს ქველმოქმედებაზე იშვიათად საუბრობთ... არადა, საჯარო სკოლების უმეტესობა თქვენი ფინანსებით არის გარემონტებული...

- 400 სკოლა რომ გარემონტდა, ოთხმოცი მილიონი პირდაპირ ბიუჯეტში გადავრიცხე, რაც ქველმოქმედებაში არ აისახება... მათ უნდოდათ, რომ თავად მიეწერათ ამ სკოლების გარემონტება... სიმართლე გითხართ, მე არც მქონდა რაღაც ამბიციები და დაუფიქრებლად გადავურიცხე ეს თანხა. `დაიბრალეთ თქვენ-მეთქი”, ვეუბნებოდი და ასევე ვეუბნებოდი სოფლის მეურნეობაზეც... რამდენიც იყო საჭირო, მზად ვიყავი, მთლიანი თანხა გამეღო, ოღონდ სოფლის მეურნეობის განვითარება სწორად მომხდარიყო... გლეხებს რომ ვუყურებდი, მათი საცოდაობით ვიწვოდი... და იმ ხარების საცოდაობით, გლეხები რომ ამუშავებდნენ. `მირჩევნია, მე დავიდო ზურგზე ის ტვირთი, ვიდრე იმ გასაცოდავებულ ხარებს ვუყურო-მეთქი”, ვეუბნეოდი და სერიოზულ დაფინანსებასაც ვთავაზობდი, მაგრამ...

- იმასაც ამბობენ, თითქოს “ვარდოსანთა” ერთ-ერთი მთავარი იდეოლოგისა და ქართული განათლების “რეფორმატორის”, ქართული უნივერსიტეტისა და მეცნიერების მესაფლავის კახა ლომაიას ძმა თქვენს ფირმაში მუშაობს ხელმძღვანელ თანამდებობაზე მოსკოვში...

- დიახ, ლომაიას ძმა დღემდე მუშაობს ჩემს სტრუქტურებში რუსეთში და არის ძალიან წესიერი კაცი, მე ასე ვთვლი... საკუთარი ძმის გამო თვითონაც წითლდება ხოლმე, როცა მხვდება... სხვათაშორის, კახა ლომაიას არც ვიცნობ... ერთხელ ვარ შენახვედრი...

- ეთანხმებით თუ არა იმ მოსაზრებას, რომ განათლების ის რეფორმა, რომელიც კახა ლომაიას მინისტრობისას გატარდა, დამღუპველი გახდა ჩვენი შვილების თაობისათვის?! და, რომელ რეფორმასაც დღევანდელ საგანმანთლებლო სისტემაში და სკოლებში ისეთივე წარმატებით ახორციელებს ციხეების ყოფილი უფროსი შაშკინი... ინფორმაციისთვის: ლომაია როცა ანგრევდა ქართული განათლების რეფორმას, ლევან ბერძენიშვილი პარლამენტში განათლების კომიტეტს ხელმძღვანელობდა...

- აბსოლუტურად გეთანხმებით! აბსოლუტურად ვიზიარებ თქვენს პოზიციას!

- სხვათაშორის, ლომაიასეულ რეფორმას თავის დროზე აღფრთოვანებულები შეხვდნენ რესპუბლიკელები, განსაკუთრებით - ლევან ბერძენიშვილი...

- გეთანხმებით, ეს შეცდომაა! მაგრამ ეს არ არის ღალატი! თუ რესპუბლიკელებს ვუბრუნდებით, გიმეორებთ - ეს იყო შეცდომა, მაგრამ არა - ღალატი! ისე, თუ უკან დაბრუნებაა, საკუთარ თავს აქვე გავისამართლებ და გეტყვით: დიახ, მე გაცილებით ადრე უნდა გამეგო, ვინ იყვნენ ესენი და მაინცდამაინც შვიდი ნოემბერი არ უნდა გამხდარიყო ჩემთვის ამ ყველაფერზე `ფარდის ამხდელი~! სანდრო გირგვლიანის მკვლელობის შემდეგ მე დინსტანცირებას ვახდენდი სააკაშვილისგან, მაგრამ არა იმ დოზით, თურმე, რა დოზითაც საჭირო ყოფილა!

- გიგა ბოკერიას ფაქტორი არის კითხვის ნიშნებით სავსე. ირაკლი ალასანაის და გიგა ბოკერიას შეხვედრებზე რომ აღარაფერი ვთქვათ, თქვენი დამოკიდებულება როგორია მისი პერსონის მიმართ? რამდენად დადებით მოვლენად მიგაჩნიათ ამ ხელისუფლებაში და რამდენად უარყოფითად - ქვეყნისათვის?

- მე არ დავმალავ და შეგიძლიათ, დაწეროთ, რომ გიგა ბოკერია მე ოდესღაც ძალიანაც მომწონდა! სხარტი გონების, ახალგაზრდა, განათლებული ბიჭი... ერთხელ გავიხსენე კიდეც მასთან ჩემი ურთიერთობა 2008 წელს, ომის დაწყებასთან დაკავშირებით... მე ვერიდებოდი ხოლმე ყველასთან შეხვედრას, მაგრამ მიშას თხოვნით შევხვდი გიგას... სხვათშორის, მაშინაც გიგას პირით უნდოდა საკუთარი სათქმელის ჩემამდე მოტანა.. სამხრეთ ოსეთის პრობლემებზე იყო მაშინ საუბარი...

- ბატონო ბიძინა, თუ დავკონკრეტდებით, თქვენთვის „სამაჩაბლო“უფრო მისაღებია თუ `სამხრეთ ოსეთი“?

- ისტორიულად `სამაჩაბლო~ ყოფილი სამხრეთ ოსეთის ოლქის მხოლოდ ერთი ნაწილია და, დღევანდელი რეალობის გათვალისწინებით `სამხრეთ ოსეთად~ მოხსენიება უფრო მიზანშეწონილად მიმაჩნია. გულწრფელად გეტყვით, ახალი სახის დაპირისპირებებისგან თავი უნდა შევიკავოთ, რადგან არც საამისო ძალა გვაქვს და არც სურვილი, ასე მგონია...

- თქვენ არსად გაგიცხადებიათ თქვენი დამოკიდებულების შესახებ... ვინ არის თქვენთვის ზვიად გამსახურდია?

- თუ არც ახლა ვისაუბრებთ ბევრს, შეიძლება უკეთესიც იყოს... ბევრი ზვიად გამსახურდიას სახელს ამოეფარება ხოლმე და ისე ცდილობს პოლიტიკური ქულების დაგროვებას. ეს იყო პატრიოტი კაცი, რომელიც არ ცრუობდა, როგორც სააკაშვილი ცრუობს! ამას ჩემთვის პრინციპული მნიშვნელობა აქვს... ზვიადს გულწრფელად უყვარდა სამშობლო და მისი ღვაწლი ქვეყნისთვის დამოუკიდებლობის მოპოვების საქმეში უდიდესია! გიმეორებთ: ზვიადი ჩემთვის, გულში, გულის სიღრმეში პოზიტიური პიროვნება და პატრიოტი კაცია!

- 1991-92 წლების მოვლენებს როგორ აფასებთ, ბატონო ბიძინა? არც იმდროინდელ მოვლენებზეა თქვენი პოზიცია ცნობილი საზოგადოებისთვის...

- რა თქმა უნდა, საშინელება მოხდა მაშინ! ყველაზე ცუდი რაც შეიძლებოდა, რომ ჩვენს უახლეს ისტორიაში მომხდარიყო, სწორედ 1991-92 წლებში მოხდა! ამის შემდგომ ვეღარ გავიმართეთ წელში...

- ეთანხმებით თუ არა, რომ ეს იყო კანონიერი ხელისუფლების დამხობა ძალადობრივი გზით, რომ ეს იყო სახელმწიფო გადატრიალება და პუტჩი?

- რა თქმა უნდა! რა თქმა უნდა! აბსოლუტურად!

- თუ ეს იყო სახალხო ამბოხი, როგორც წლების განმავლობაში აჩვევდა ქართველ საზოგადოებას ესა თუ ის პოლიტიკოსი?

- არა! ეს იყო აბსოლუტურად სამხედრო გადატრიალება და მეტსაც გეტყვით: ისიც ვიცი, როგორც ხდებოდა და შიგნიდანაც მაქვს ინფორმაციები...

- და რომელ ინფორმაციებსაც, რა თქმა უნდა, დღეს ვერ გაგვიმხელთ..

- არა, რატომ? რატომ ვერ გავბედავ და ვერ ვიტყვი, როგორ ვფიქრობ? ყველაფერსაც ვიტყვი, მაგრამ ახლა იმდენად საინტერესო შეიძელბა არც იყოს... თუ გსურთ, მომავალში ვისაუბროთ ამ თემებზე...

- ბატონო ბიძინა, მეოთხე თვეა, რაც პოლიტიკაში ხართ... ხალხი თქვენგან გაცილებით უფრო მეტ აქტიურობას ელის, არდა, თითქოს პასიურობს თქვენი გუნდი... საზოგადოება უკმაყოფილია თქვენი უმოქმედობით...

- მე ვთვლი, რომ ნაწილობრივ, შესაძლოა, საყვედურადაც მივიღო თქვენი ნათქვამი... თუმცა, ისიც ვთქვათ, რომ საზოგადოება რადიკალიზმს შეეჩვია ბოლო წლების განმავლობაში. ვთვლი, რომ თუ მსგავსი პოზიცია აქვს საზოგადოების გარკვეულ ნაწილს ჩემთან და ჩემი გუნდის ქმედებებთან დაკავშირებით, ამ შემთხვევაში მათი პოზიცია არასწორია. ისინი ანალიზს განვლილი წლების განმავლობაში მომხდარი მოვლენების ფონზე აკეთებენ, მე კი მიმაჩნია, რომ ყველაფერი სწორად კეთდება და სწორი მიმართულებით მიდის! ქართველები რომ სულსწრაფები ვართ, არც ეს არის, ვფიქრობ, ვინმესთვის უცხო. ადეკვატურად უნდა შევაფასოთ პროცესები...

- ანუ, თქვენი მზადება არის “მზადება ნახტომისათვის”?

- რა თქმა უნდა... თუმცა, ნახტომს არ დავარქმევდი... მკვეთრი და რადიკალური ქმედებების დრო ახლა არ არის... აქამდე მეც მჭირდებოდა გარკვეულწილად ჩამოყალიბება რაღაც საკითხებში. ამ ხნის განმავლობაში მხოლოდ ერთადერთ კვირა დღეს მივეცი საკუთარ თავს დასვენების უფლება... სხვათაშორის, ამ დატვირთული რეჟიმის დაძლევაში ისიც მიწყობს ხელს, რომ სპორტს მივდევ...

- სიგარეტს ეწევით, ბატონო ბიძინა?

- არა, არა... მაგის დრო სად მაქვს?! რომ ვეწეოდე, ალაბთ, ამდენს ვერც შევძლებდი. მე ყოველ დილით ვაკეთებ იოგას და ეს მშველის, თუმცა, აღვნიშნოთ აუცილებლად, რომ იოგა არ არის ჩემი მსოფლმხედველობა. აბსოლუტურად არ ვიზიარებ მას, თუმცა, იოგა ძალიან კარგი სპორტია და ძალიან სასარგებლოა სახსრებისთვის... ისე, ოდესღაც მეც ვეწეოდი, მაგრამ არასდროს ვყოფილვარ ძლიერი მწეველი. სულ სპორტისკენ მქონდა მიდრეკილება...

- ისე, რომ არ დაგიმალოთ, აპოლიტიკურ თემებზე სასაუბროდ ჭორვილაშიც გვინდა თქვენთან სტუმრობა...

- კი, ბატონო, ვერ ვხედავ ვერანაირ პრობლემას...

- გავაგრძელოთ საუბარი... წეღან საუბარში ირაკლი ოქრუაშვილი ახსენეთ...

- ოქრუაშვილი ამათი ტიპიური სახეა. რა თქმა უნდა, ვფიქრობ, რომ ის თანამშრომლობს ამ ხელისუფლებასთან და დღესაც ამ გუნდის წევრია! მათ მოუვიდათ შიდა კონფლიქტი, თუმცა, ახლა კვლავ ერთად არიან, მე რამდენადაც ვიცი...

- თქვენ ამბობთ, რომ თქვენთვის მიუღებელია ყოველგვარი რევოლუციური სცენარი, მაგრამ ხალხს ამ რეჟიმის პირობებში სამართლიანი არჩევნების ჩატარების იმედი არა აქვს და ჰგონია, რომ სააკაშვილი კვლავ საარჩევნო ხმების გაყალბების გზით წავა. ამ შემთხვევაში რა მექანიზმები გაქვთ ხმების დასაცავად და როგორ უნდა შეინარჩუნოთ გამარჯვება?

- ძალიან კარგი კითხვაა და გიპასუხებთ, მით უფრო, არსად მისაუბრია ამ კუთხით... მუდმივად ამას ვგულისხმობდი, როცა ვამბობდი, რომ ორი მესამედით მოვალთ ხელისუფლებაში-მეთქი. ერთპარტიულობაც დამწამეს, არადა, ჩვენს კოალიციაში არ არის მხოლოდ ერთი პარტია და სწორედაც რომ მრავალპარტიული კოალიცია გვაქვს და ჩვენი გამარვჯების შემთხვევაშიც, პარლამენტი მრავალპარტიული იქნება. ვაცნობიერებ რეალობას და გეტყვით, რომ ჩვენთან გაყალბების საწინააღმდეგოდ იურისტთა ჯგუფები მუშაობენ. ისე, სულაც არ მაქვს იმის განცდა, რომ ესენი - ამ ხელისუფლებას ვგულისხმობ - ასე უცებ შეიცვლებიან და სუფთა ხელებით ჩაატარებენ არჩევნებს. რა თქმა უნდა, სიცრუეს და გაყალბებას ძალადობის გზითაც ეცდებიან, მაგრამ მე მოვლენების განვითარებას ასე ვხედავ: ვფიქრობ, არჩევნებამდე ამერიკის ადმინისტრაციას საკმაოდ მკვეთრი დამოკიდებულება ექნება და ეს უკვე იკვეთება კიდეც. ვთვლი, რომ გაყალბების შემთხვევაში, არც ამერიკა და არც ევროპა ხელს არ მოაწერენ არჩევნების გაყალბების მორიგ პრეცედენტს...

- გაყალბებაში რა და რამდენი პროცენტი გაქვთ ნაგულისხმები?

- რა თქმა უნდა, ხუთპროცენტიანი ცდომილებისგან დაზღვეულები არ ვართ, მაგრამ “ნაცმოძრაობა” ოცი პროცენტით ვერავითარ შემთხვევაში ვერ გააყალბებს საარჩევნო შედეგებს! ჩვენ უნდა ავუხსნათ და რეალურად უნდა დავარწმუნოთ საზოგადოება ყველა ნიუანსში. თეთრი და შავი ახლა იმდენად მკვეთრად არის გამიჯნული და გამოკვეთილი ერთმანეთისგან, რომ მთავარია, ეს ყველაფერი სწორად და მათთვის გასაგებ ენაზე მივიტანოთ საზოგადოებამდე. მე ამის იმედიც მაქვს, რომ ეს ასეც იქნება.

- და თუ მაინც წავიდა ეს რეჟიმი რისკზე და გააყალბა არჩევნები?

- იმ შემთხვევაში, თუ ოცი და ოცდაათი პროცენტის გაყალბება მოინდომა ხელისუფლებამ, რა თქმა უნდა, მსგავს შემთხვევაში ჩვენ ანგელოზები ვერ ვიქნებით! დიახ, ქუჩაშიც დავდგებით და ხმებსაც დავიცავთ! გიმეორებთ: კანონით განსაზღვრული ყველა მეთოდით დავიცავთ ჩვენს ხმებს!

- თუ საჭირო გახდება, ბიძინა ივანიშვილი მოუწოდებს ხალხს ქუჩაში გამოსვლისაკენ?

- რა თქმა უნდა! თუ საჭირო გახდა, ხმების დასაცავად ხალხს ქუჩაში გამოსვლისკენაც მოვუწოდებ! ქართველი ხალხი ასე ადვილად აღარ დათმობს გამარჯვებას! ეს არ იქნება ქუჩიდან ხელისუფლების ძალით დამხობა, მაგრამ ხალხი თავის ხმებს აუცილებალდ დაიცავს და ხალხი თავად აჩვენებს მთელ მსოფლიოს, ვინც მოიგებს არჩევნებს.

- სააკაშვილის პარტიის უმრავლესობით მოსვლას გამორიცხავთ?

- აბსოლუტურად გამოვრიცხავ! მომავალ არჩევნებში მათ გამარჯვებაზე ლაპარაკი დროის უაზროდ ფლანგვაა. ის კი არა, ნორმალური ანალიტიკოსი და მრჩეველი რომ ჰყავდეს ვინმე, აუცილებლად ურჩევდა სააკაშვილს, რომ რაც უფრო ადრე დაწერს გადადგომის განცხადებას, უფრო უკეთესი იქნება მისთვის! `ნაციონალური მოძრაობა~ ქვეყნის დამანგრეველ ძალად იქცა და სამწუხაროდ, წარმატებით ახორციელებს ქვეყნის ნგრევის საქმეს!

- ბატონო ბიძინა, ცოტნე გამსახურდიაზე რა აზრის ბრძანდებით? უკვე მეოთხე წელია, სააკაშვილის რეჟიმის პირად პატიმრად არის ქცეული ზვიად გამსახურდიას ვაჟი...

- სხვათაშორის, აუცილებელი აღნიშვნის ღირსია ის ფაქტი, რომ 2007 წელს, როცა პირველი პრეზიდენტის ნეშტი საქართველოში გადმოასვენეს, მისი  ვაჟი ხელმძღვანელობდა გადმოსვენების პროცედურას და ის, რომ ამ ხელისუფლებას არ მისცა ამ ფაქტის გაპიარებისა და სათავისოდ გამოყენების შანსი - ძალიან კარგი ქნა. მთავრობის სახლის წინ რომ დაასვენეს ცხედარი და მიშა გამოჩნდა, ხალხის რეაქცია იყო ყველა კითხვაზე პასუხი, როცა `ზვიადი-ზვიადის~ შეძახილებით შეხვდნენ სააკაშვილს! დიახ, ძალიან კარგი ქნა, როცა ამ რეჟიმს არ მისცა ამ ფაქტის სათავისოდ გამოყენების შანსი.

- ბატონო ბიძინა, კონსულტაციები მიმდინარეობს “ფორუმთან”. ბუნებრივია, ამ კონსულტაციების დეტალების გამხელას ახლა არ გთხოვთ, მაგარმ გვაინტერესებს, “ფორუმის” შემოსვლა კოალიციაში პარტიულად მოხდება თუ ინდივიდუალურად?

- დაველოდოთ კონსულტაციების დასრულებას, ყველაფერი გაირკვევა და ყველა კითხვას გაეცემა პასუხი. უახლოეს დროში ეს თემა გარკვეული იქნება. სხვათაშორის, ერთ სიახლესაც ვეტყვი თქვენი გაზეთის საშუალებით ქართველ საზოგადოებას. ცოტა ხანში ჩვენი პარტიის საინიციატივო ჯგუფსაც გავაცნობთ საზოგადოებას.

- ცნობად სახეებს ვიხილავთ?

- აუცილებლად ვიხილავთ ცნობად სახეებსაც და მე ვფიქრობ, არ იქნება ბევრი საკამათო სახე ამ 10-15-კაციან გუნდში. ამის შემდეგ ჩვენ რეგიონებში სხვა ტემპით გავაგრძელებთ მუშაობას და მე ახლა მინდა დავამშვიდო ჩვენი მხარდამჭერები, რომლებიც ყველა ამ დეტალზე ნერვიულობენ: დამშვიდდით, ყველა ნაბიჯი გათვლილია და სანერვიულო არაფერია! ყველაფერი დროულად და ძალიან კარგად იქნება! დღეს ჩვენი მუშაობის ძირითადი აქცენტი პარტიის მშენებლობაზეა გადასული. საზოგადოებრივი მოძრაობა ამ ეტაპზე ერეკლეს მოედანზე მდებარე ოფისში გააგრძელებს საქმიანობას და მის ხელმძღვანელად ჯერჯერობით მე ვრჩებეი, ვინაიდან არსებული კანონმდებლობის თანახმად, მოქალაქეობის არმქონე პირებს ეკრძალებათ პარტიული საქმიანობა. პარტიას ამ ეტაპზე ჩემი მეუღლე უხელმძღვანელებს, თუმცა, წეღანაც აღვნიშნე და გავიმეორებ - ვფიქრობ, რომ ჩემი მოქალაქეობის საკითხი  ძალიან მალე დადებითად გადაწყდება, რადგან სააკაშვილს სხვა ალტერნატივა არ გააჩნია და აქედან გამომდინარე, პარტიის პირველი ნომერიც მე ვიქნები... თუმცა, თუ იმასაც გავითვალისწინებთ, რომ სააკაშვილი ყველაფრის უფლებას აძლევს საკუთარ თავს და შესძალოა, ერთი-ორი პროცენტით დავუშვათ ის, რომ მე ვერ მივიღებ საქართველოს მოქალაქეობას, ამ შემთხვევაში ჩემი მეუღლე გააგრძელებს პარტიის ხელმძღვანელობას...

- თუმცა, ვაღიაროთ, თუ თქვენი ლიდერობისა და გამარჯვების შემთხვევაში საუბარი იქნებოდა პარლამენტის თავმჯდომარეობაზე ან პრემიერობაზე, თქვენი მეუღლის შემთხვევაში ეს რანგი შეიცვლება და იგივე ალტერნატივები ვეღარ იქნება...

- დღეს იმდენად პატარა ალბათობაა მოვლენების ამგვარი სცენარით განვითარებისა, ჯობს, თავი შევიკავოთ სამომავლო პროგნოზების გაჟღერებისგან და უბრალოდ, სხვა საქმე ვაკეთოთ. დრო ყველაფერს გამოაჩენს და ჩვენც შესაბამისად ვიმოქმედებთ ნებისმიერი სახის სცენარის განვითარების შემთხვევაში.

- თქვენ ბრძანეთ, რომ რუსეთთან აუცილებელია დიალოგი და ჩვენ ვალდებულნი ვართ, დიალოგი ვაწარმოოთ რუსეთის იმ ხელისუფლებასთან, რომელსაც ხალხი მისცემს ლეგიტიმაციასო. ისიც ფაქტია, რომ რუსეთისთვის გამაღიზიანებელია ჩვენი სწრაფვა ნატო-ში ინტეგრაციისკენ. როგორ წარმოგიდგენიათ ამ პრობლემის მოგვარება და ნატო-ში ჩვენი გაწევრიანების პერსპექტივას როგორ უყურებთ?

- ვფიქრობ, რომ ნატო და პროდასავლური კურსი არის ჩვენი ქვეყნის ბედი. ნურცერთ პოლიტიკოს ნუ ექნება იმის ილუზია, თითქოს ქართველი ხალხი შეეგუება სხვა არჩევანს. მე ძალიან კარგად ვიცი ქართული ხასიათი, ამაზე ნაფიქრიც მაქვს და ნამუშევარიც და გეტყვით პირდაპირ: საქართველოსთვის არ არსებობს სხვა გზა, გარდა ნატო-სკენ სწრაფვისა და ერთიან ევროპულ ოჯახში ადგილის დამკვიდრებისა! თუმცა, ისიც კარგად უნდა გავაცნობიეროთ, რომ ჩვენი ბედია ის საზღვარიც, რომელიც დიდ სახელმწიფოსთან რუსეთთან გვაქვს. ჩვენი გუნდის ვალდებულებაა, რომ ეს კარგად გავაცნობიეროთ. დღევანდელი გადმოსახედიდან მკვეთრი განცხადებაა, მაგრამ გეტყვით: მე შესაძლებლად მიმაჩნია ერთდროულად რუსეთთანაც სწორი ურთიერთობის დამყარება და ნატო-სკენ სწრაფვაც! რა თქმა უნდა, მძიმე სამუშაო გველის წინ, მაგრამ თუ გონივრულად არ დავგეგმეთ ყველაფერი, ძალიან გაგვიჭირდება ქვეყნის მშენებლობა. ჩვენ უნდა მოვახერხოთ, სწორ დროს, სწორი პოლიტიკის შემთხვევაში სწორად და გონივრულად გამოვიყენოთ სიტუაცია. ფაქტია, ვერც რუსეთს ვერ გადაიტანს ვერავინ იმ გეოპოლიტიკური სივრციდან, რომელშიც არის და ვერც საქართველოს შეუცვლის ადგილს ვერავინ! პირველ რიგში, დემოკრატიულ ინსტიტუტებზე დაფუძნებულ ქვეყნად უნდა ვიქცეთ,სადაც აღარ იქნება მსგავსი ავტოკრატია, რაც სააკაშვილმა მოგვახვია თავს. დიახ, საინტერესონი უნდა გავხდეთ აფხაზებისთვისაც და ოსებისთვისაც და ამასაც ხმამაღლა ვაცხადებ! ჩემთვის გადამწყვეტია ის ოცდაათსაუკუნოვანი ქართული კულტურა, რომელიც, ჩვენდა საბედნიეროდ, გაგვაჩნია და ვთვლით, რომ ეს ჩვენი კულტურა აუცილებლად მისაბაძია და გასათვალისწინებელია ძალიან ბევრი  ერისთვის და ეთნიკური უმცირესობისთვის.

- თქვენ მოგეწონათ პოლიციის რეფორმა და ეს არც დაგიმალავთ...

- შემთხვევით გამოუვიდათ ეს რეფორმები კარგად და ფაქტია, რომ ამ რეფორმის შედეგად ათიათასობით ადამიანი გადაეჩვია ქრთამის აღებას.

- პოლიციის რეფორმის ქებამ აზრთა სხვადასხვაობა გამოიწვია საზოგადოებაში. ამ რეფორმის ქების შემდეგ რას ეტყვის ბიძინა ივანიშვილი ზურა ვაზაგაშვილის, ბუტა რობაქიძის, გიორგი გამცემლიძის და პატრულის მიერ იმ უდანაშაულოდ ჩაცხრილული ასობით ახალგაზრდის ოჯახს, რომელთა გაუბედურებაც, ვთქვათ პირდაპირ, სწორედ პოლიციელთა სინდისზეა.

- ამას ვწერდი მე და გიმეორებთ: როცა პოლიციის რეფორმაზე ვსაუბრობთ, ისიც უნდა დავინახოთ, რომ ამავდროულად პოლიცია პოლიტიზირებულ ძალად არის ქცეული. ეს არის ამათი სახე! სამწუხაროდ, დღეს საქართველოში არსებობს პოლიტიკური პოლიცია, რითაც ყველა მიღწევასა და წინსვლას ხაზი გადაუსვეს და გააფერმკრთალეს! დღეს სააკაშვილის რეჟიმი დგას მინის ფეხებზე და ყველანი ძალიან მალე ვნახავთ, როგორ გადაიმსხვრევიან!

- გამორიცხავთ, რომ სააკაშვილმა გაზაფხულზე დანიშნოს არჩევნები?

- არ გამოვრიცხავ!

- და, თუ იქნებით მზად ასე ნაუცბათევად დანიშნულ არჩევნებში მონაწილეობის მისაღებად?

- რატომაც არა?! მეტიც - ჩვენ გვაქვს შესაბამისი გეგმები, რომელთა განხორციელებასაც სიტუაციიდან გამომდინარე გავაგრძელებთ!

- რეგიონებში თუ აპირებთ გასვლას და მოსახლეობასთან პირისპირ შეხვედრებს?

- საჭიროების შემთხვევაში - აუცილებლად! და არა იმიტომ, რომ მიშა დარბის... თუმცა, სხვა მექანიზმებიც და გზებიც არსებობს ხალხთან ურთიერთობისთივს და მე ყველა გზას და მეთოდს ეფექტურად გამოვიყენებ, რასაც საჭიროდ ჩავთვლით! მე ჩვენს ხალხს ვაძლევ ერთადერთ პირობას - ვიქნები განუხრელად დამცველი იმ პოზიციებისა, რაც გვაქვს! ძალიან იშვიათად ვდებ პირობას, არ მიყვარს შეპირებები და ძალიან ვერიდები ამას, მაგრამ ქართველ ხალხს ერთადერთს ნამდვილად ვპირდები - რასაც ვაცხადებ და რა მიზნებითაც შემოვედი პოლიტიკაში, განუხრელად ვიქნები მისი დამცველი! ყველა ჩემი განცხადება გულწრფელია და პირდაპირ გეტყვით: ოთხმოცდაათი პროცენტით ვარ დარწმუნებული, რომ უმრავლესობით მოვალთ ხელისუფლებაში! სააკაშვილს გაცნობიერებული აქვს ჩემი შესაძლებლობები და ამიტომაც ეშინია! როგორც გაზაფხულის მოსვლას ვერ შეაჩერებს, ისე ვერ შეაჩერებს ჩვენს გამარჯვებას ეს ხელისუფლება!

ბიძინა ივანიშვილს ესაუბრა გიორგი მამაცაშვილი, ჯაბა ხუბუა და გიორგი გიგაური

გაზეთი "ასავალ დასავალი" 06.02.2012